नेकपा-माओवादीको संस्थापन पक्षले सचिव नेत्रविक्रम चन्दसँग सम्बन्ध विच्छेदको भएको बताएको छ। यसअघि आज बिहान अध्यक्ष वैद्यलाई चन्द पक्षले बुझाएको तीन बुँदे पत्रबारे संस्थापन पक्षले निर्णय गर्दै क्रान्तिकारी लाइनलाई हेर्ने दृष्टिकोणमा नै फरक परेपछि अब एक भएर अगाडि बढ्न नसकिने भन्दै पार्टी फुटेको हो।
पार्टी अध्यक्ष मोहन वैद्यसहितका नेताहरूले केन्द्रीय समितिको बैठकमा सोमबार कार्यकर्तामाझ विप्लप नेतृत्वको मोर्चालाई सहमतिमा ल्याउन नसकिएकाले अब छुट्टिएर बस्नु नै उपयुक्त हुने निकालेका छन्।
सहमतिका लागि हदैसम्मको लचिलो बन्दा पनि चन्द पक्षसँग सहकार्य हुन नसकेको निश्कर्ष निकाल्दै संस्थापन पक्ष चन्द समूहबाट अलग हुने निर्णय गरेकाे हाे। यद्यपि औपचारिक निर्णय भने भइसकेको छैन।
उता विप्लव पक्षले पनि अब, संस्थापनबाट छुट्टिएकाे बताएकाे छ।
यस्तै विप्लप नेतृत्वको एक नेताले भने, ‘हामी बाहिरिएका छौं, हाम्रा कुराहरु केहीबेरमा प्रेस विज्ञप्तिमार्फत सार्वजनिक गर्दैछौ।’
विप्लवसँगको सम्बन्ध विच्छेदबारे संस्थापन पक्षले पनि केहीबेरमा विज्ञप्ति निकालेर पुष्टी गर्दैछ।
तीन धारमा बाँडिएको नेकपा माओवादीका अध्यक्ष मोहन बैद्य किरण तथा सचिव नेत्रविक्रम चन्द विप्लवबीच पुनः फाटो आएपछि केन्द्रीय कमिटीको बैठक पनि बस्न सकेको थिएन।
स्पष्टीकरण माग्ने निर्णय फिर्ता लिने भनेर विप्लव पक्षलाई बैठकमा बोलाइए पनि अध्यक्ष किरणले राजनीतिक प्रतिवेदनमार्फत 'पार्टी अनुशासनमा नबस्नेहरू पार्टी छोडेर गएहुन्छ' भनेपछि पुनः विवाद चर्किएको हो।
आइबार केहीबेर बसेको बैठकपछि चर्काचर्की भएको थियो। त्यसपछि सोमबार बिहान पनि बैद्य र विप्लवबीच केहीबेर छुट्टै कुराकानी भएको एक नेताले सेतोपाटीलाई बताए। यो भेटवार्तामा पनि कुरा नमिलेपछि सोमवार बैठक बस्न सकेन।