Dili drug ug gambling lord ang nagpapatay ni PO2 Parages?

By: Lloyd Suarez October 22,2014 - 07:03 AM

Unsa namay kalambo-an sa imbestigasyon sa Minglanilla Police sa pagpusil patay sa ilang kauban niadtong Domingo duol sa tigbakayan nga si PO2 Omar dela Calzada Parages nga sakop sa Police Community Relations kon PCR?

Unsa man gyud ang motibo sa pagpatay? Makalibog kay ang trabaho niining mga pulis sa PCR mao man ang pagpalig-on sa relasyon tali sa kapolisan ug komunidad.

Sigurado ko nga duna gyu’y naglagot ni PO2 Parages kay gipatay gud siya sa tulo ka mga suspetsado.
Unsa man ang gi-ingong business proposal nga maoy gipananghid sa pulis sa iyang asawa pagdayong biya sa ilang bay kuyog sa iyang anak?

Wa kahay kalambigitan ang tigbakay ug ang pagkuyanap sa illegal nga drugas ang kamatayon ni PO2 Parages?

Dili kaha panimaws ug sumpay ang pagpatay ni PO2 Parages sa pagka-angol ni Boljoon Police chief Dexter Basirgo nga mi-conduct ug hot pursuit nga mipatay nila ni Arnel Coronel ug John Michael Mejares didto sa Boljoon nga mga kauban niadtong unang tulo nga napatay sa Dalaguete ug Alcoy ug ang pagkasikop sa laing napulo?

* * *

Pangkulob sa kaldero ngadto sa mga habal-habal drivers kining pagpangopya ni Provincial Board Member Arleigh Sitoy sa ordinansa sa Mandaluyong City nga dili na maka-angkas sa motorsiklo ang mga dili asawa sa mag-drive ug kadtong mga paryente ug mga barkada ug kauban sa trabaho.

Makalolo-oy gyud ang mga nagtinarong nga drivers/operators nga nagsalig intawn sa ilang panginabuhi sa habal-habal.

With all due respect ni kagawad Sitoy, dili gyud sulbad sa nagkataas nga krimen kining pag-ban sa riding in tandem o pag-angkasay sa motor.

Ang paningkamot sa atong kapolisan nga magsige’g check-point sa kadalanan maoy epektibo kaayong paagi.

Atong ibutang nga mapasar kining kinopya nga ordinansa, makapugong ba gyud kini sa mga kriminal pag-execute sa ilang mga dautang binuhatan?

Mangambot lang ko kung maka-implimentar ba ang atong mga otoridad niining proposed ordinance?
Maglisud man gani ug dakop niadtong mga mag-motor nga way lisensiya.

* * *

Dunay kasaligang tinubdan nga naglungot-lungot intawn silang mga kawani sa DOJ prosecution service dinhi sa Sugbo kay ang ilang tali-abot nga Christmas party sa regional level karong Disyembre 12 adto sa Bohol ipahigayon.

Ang mahitabo mapugos sila pagtambong ug pag gasto alang sa ilang plete ug hotel accommodation.
Matud sa akong source nga sila pay gagmay ug sweldo ug way allowance, sila pay pagastohon nga unta duna may budget ang DOJ Manila.

Gisaway nila si Regional State Prosecutor Fernando Gubalane nganong dili kapangita ug budget pero giingong paspas kaayong makapagawas sa kwarta sa DOJ nga pang-allowance nilang mga piskal.
Gikinahanglan pa ba nga may regional Christmas party nga hasol kaayo intawn sa mga estranghero?

Sa text ni Gubalane isip iyang tubag sa isyu mao kini: “Dec 12, yearend conference and recognition and GAD seminar for prosecutors and staff. Incidental lang ang fellowship kay naa naman jud tanan.

Approved na ang activity ug ang DOJ nag allocate 200,000 kay official man. Anti-trafficking summit pud na ug Sec. De lima amo gi invite as guest”.

Kung mitiyabaw ang taga Sugbo unsa na kaha tawn ang gikan sa Negros Oriental nga medyo taas-taas intawn ug latason.

Kung di gyud makaya sa budget per employee nganong pugson man tanan? Lisud gyud basta pamilyado unya gamay kaayog sweldo ug puno sa utang!

Lisuda pud anang mag-party ta nga dunay mang-reklamo. Di gyud ta ma-enjoy ug mahubog ana! Hehehehe.

* * *

Wa gyud mapan-os akong istorya nga ma-inutil gihapon ang gobyerno sa Pilipinas pag-acquire ug jurisdiction kang US Marine PFC Joseph Scott Pemberton kinsa gikasohan na sa pagpatay kang transgender woman Jeffrey “Jennifer” Laude.

Kay ubos sa lagda sa VFA kon Visiting Forces Agreement ang US government maoy maka-kustodiya sa ilang sundalo nga makahimo ug krimen dinhi sa atong teritoryo.

Paingon sa way nada ning maong kaso kay gani gipasibat na ang upat ka mga kaubang US Marines nga maka-testigo unta sa krimen.

Mangambot lang ko kung di ba manghilom ang pamilya ni Laude kung bagsakan ug dakung kantidad sa gobyerno sa USA o ba kaha tanyagan nga dunay mga sakop sa pamilya nga adto papuy-on ug adto patrabahoon.

Kumusta naman si Pemberton karon? Anaa pa ba siya sa USS Peleliu nga naka-angkorahi Subic Bay?

Wa gani siya motunga kagahapon sa preliminary investigation kay ang subpoena matud pa wala siya gi-require nga motunga unya tun-an pa sa iyang mga abogado ang kaso.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS:

We use cookies to ensure you get the best experience on our website. By continuing, you are agreeing to our use of cookies. To find out more, please click this link.