UAAP football title nakataya sa laban ng FEU-Ateneo
Laro Ngayon (Rizal Memorial Stadium)
3 p.m. ADMU vs FEU (Men’s Finals)
6 p.m. DLSU vs UST (Women’s Finals)
MANILA, Philippines - Paglalabanan ng Ateneo at Far Eastern University ang kampeonato sa paglarga ng UAAP Season 79 men’s football championship ngayong hapon sa Rizal Memorial Stadium sa Maynila.
Magbabakbakan ang Blue Eagles at Tamaraws sa alas-3 ng hapon habang pakay naman ng La Salle na makumpleto ang matamis na sweep sa pagharap nito laban sa University of Santo Tomas sa women’s championship game sa alas-6 ng gabi.
Naisakatuparan ng Tamaraws ang inaasam na pagbabalik sa finals gamit ang epektibong sistema ni coach Vince Santos.
Kaya naman nais ng FEU na huwag nang palampasin pa ang pagkakataong ito upang maibalik sa kanilang teritoryo ang korona.
Sa semifinals, pinataob ng Ateneo ang University of Santo Tomas, 2-1 habang namayani naman ang FEU sa University of the Philippines sa bisa ng parehong iskor upang hubaran ng korona ang Fighting Maroons.
“Yun ang mga team na hindi mo sila dapat i-underestimate sa UAAP. Marami silang key players,” ani Eagles coach JP Merida patungkol sa Tamaraws.
Pakay ng Tamaraws na makuha ang ika-11 titulo sa liga kung saan sasandalan nito si graduating skipper Paolo Bugas kasama sina goalscorers Rico Andes, Alex Rayos, Audie Menzie, Val Jurao at keeper Ray Joyel.
Sa kabilang banda, ang Ateneo ay nagnanais mahablot ang ikapitong kampeonato.
- Latest