Լատվիայի Ազգային Խորհրդարանի դահլիճում տեղի ունեցավ Միջազգային Եվրոպական Շարժման երկօրյա գագաթաժողովը, որտեղ օրակարգում ընդգրկված էր նաեւ Հայոց Ցեղասպանության ճանաչման հարցը:
Ավելի քան 40 միջազգային կազմակերպությունների եւ ազգային պատվիրակությունների, այդ թվում Թուրքիայի, ներկայացուցիչներ քննարկեցին Հայաստանի Եվրոպացի Բարեկամներ կազմակերպության եւ Հայաստանի Եվրոպական շարժման կողմից հեղինակած բանաձեւ, որը ճանաչում է 1915 թվականի իրադարձությունները իբրեւ Ցեղասպանություն՝ համաձայն ՄԱԿ-ի 1948 թվականի Ցեղասպանությունների կանխարգելման եւ դատապարտման կոնվենցիայի: Կազմակերպությունը հույս է հայտնում, որ Թուրքիայի կողմից Հայոց Ցեղասպանության ճանաչումը կհանգեցնի հայ եւ թուրք ժողովուրդների մերձեցմանը եւ բարեկամեցմանը, իբրեւ լավագույն օրինակ նշելով ֆրանկո-գերմանական հաշտությունը եւ համագործակցությունը:
Հայաստանի եվրոպական շարժման նախագահ Վիկտոր Ենգիբարյանը՝ ելույթ ունենալով ժողովի պատվիրակների առաջ նշեց, - Հայոց Ցեղասպանության միջազգային ճանաչումը ունի երկու նպատակ, առաջինը կանխարգելել հետագա ցեղասպանությունները, եւ երկրորդ. ստեղծել հայ-թուրքական բարի դրացիական հարաբերություններ: Հայ-թուրքական սահմանը ցավոք դեռեւս փակ է, առկա են տարածաշրջանային անվտանգության լուրջ խնդիրներ, որոնց լուծման բանալին գտնվում է Հայոց Ցեղասպանության միջազգային, եւ հատկապես Թուրքիայի կողմից ճանաչման մեջ:
Հատկանշական է, որ Միջազգային Եվրոպական շարժման երկօրյա գագաթաժողովի ողջ ընթացքում հարցը քննարկվում էր թե աշխատանքային խմբերի, թե անձնական զրույցների եւ թե լիագումար նիստի ընթացքում:
Հայոց Ցեղասպանությունը ճանաչող բանաձեւը ընդունվեց միաձայն: