महाभूकम्पमा परेका नेपालीको उद्धार गर्न आएको विदेशस्थित टोली तथा राहत सामाग्री लिएर आउने अन्तर्राष्ट्रिय विमानलाई पार्किङ अभाव भन्दै रोकिएको छ।
त्रिभुवन अन्तर्राष्ट्रिय विमानस्थल स्रोतका अनुसार उद्धार टोली तथा राहत सामाग्री लिएर आउने भनिएका जहाजहरुले अन्य गतिविधि गर्न थालेको देखिएपछि सरकारले केही कडाई गर्ने नीति लिएको हो।
त्यस्ता जहाजहरुले आ–आफना देशका नागरिकलाई फिर्ता लैजाने समेत गरिरहेका छन्। शनिबार रातिदेखि अहिलेसम्म काठमाडौंमा सयौं जहाज आएर फर्किसकेका छन्। भूकम्प गएकै दिनबाट २४ सै घण्टा विमानस्थल खोलिएको छ। अति महत्वपूर्ण सेवाका लागि आउने जहाजलाई भने पालो हेरेर अवतरणको व्यवस्था मिलाइएको छ।
सोमबार मध्यरातमा ३ वटा ठूला चिनियाँ जहाज पनि काठमाडौं अन्तर्राष्ट्रिय विमानस्थलमा अवतरण गरेका थिए। ३ वटा जहाजले केही थप उद्धारकर्मी, राहत सामाग्री तथा केही खाने सामान लिएर आएको थाहा भएको छ। केही देशले काठमाडौं लगायत भूकम्प प्रभावित क्षेत्रमा पानीको अभाव हुन नदिन पानी समेत पठाउन थालेका छन्।